Home News Sports ශ්‍රී ලංකා ක්‍රීඩකයන්ගේ උත්සහය වතුරේ

ශ්‍රී ලංකා ක්‍රීඩකයන්ගේ උත්සහය වතුරේ

257 views
SHARE

සංචාරක ශ්‍රී ලංකා කණ්ඩායම හා සත්කාරක දකුණු අප්‍රිකා කණ්ඩායම අතර පැවැති සිවුවැනි එක්දින තරගයද ලකුණු 40කින් ජයග්‍රහණය කිරීමට සත්කාරක දකුණු අප්‍රිකා කණ්ඩායම සමත්වුනා.

නිව්ලෑන්ඩ්ස් පිටියේ ශ්‍රී ලංකා වේලාවෙන් අද (08දා) අලුයම අවසන් වූ තරගයේදී ලකුණු 367ක ඉලක්කයක් හඹා යාමට පිටියට පිවිසි ශ්‍රී ලංකා කණ්ඩායම ලකුණු 327ට දැවී ගියා.

දකුණු අප්‍රිකාවෙන් එල්ල වූ දැවැන්ත අභියෝගයට සාර්ථක ආරම්භයක් ලබාදුන් නිරෝෂන් දික්වැල්ල හා නායක උපුල් තරංග පළමු කඩුල්ල වෙනුවෙන් පන්දුවාර 16.1කදී ලකුණු 139ක් රැස්කරමින් තරගය ශ්‍රී ලංකාවට දෙසට ගෙන ඒමට සමත් වුනා.

ඉන් අනතුරුව දික්වැල්ල දැවී ගිය අතර පසුව කුසල් මෙන්ඩිස් හා එක්වූ තරංග ලකුණු 64ක සබඳතාවක් ගොඩනැංවුවා.

එහිදී තරංග සිය එක්දින දිවියේ 14 වැනි එක්දින ශතකය වාර්තා කළ අතර එය 2013 වසරෙන් පසුව ඔහු රැස්කළ පළමු ශතකයද වනවා. කුසල් මුළු ලකුණු 203දී දැවී ගිය අතර තරංගගේ ඉනිම 216දී නිමාවුණා.

තරංග පන්දු 90කදී හයේ පහර හතක් ඇතුළත්ව ලකුණු 119ක් රැස්කළේ ඔහුගේ එක්දින දිවියේ එක් තරගයකදී වාර්තා කළ වැඩිම හයේ පහර සංඛ්‍යාව ලෙස  එය වාර්තා පොතට එක්කරමින්. එසේම තරංග පන්දු 73කදී සිය ශතකය සම්පූර්ණ කිරීමට සමත් වුනා.

තරංගගේ දැවී යාමෙන් පසුව ධනංජයද සිල්වාගේ ඉනිමද අවසන් වූ අතර නැවතත් තරගය ශ්‍රී ලංකාව දෙසට ගෙන ඒමට නවක ක්‍රීඩකයන් වන අසේල ගුණරත්න හා සඳුන් වීරක්කොඩි සමත්වුණා.

ඔවුන් දෙදෙනා පස්වැනි කඩුල්ලට ලකුණු 79ක සබඳතාවක් ගොඩනගමින් තරගය නැවතත් ශ්‍රී ලංකාව දෙසට ගෙන ආවා.

කෙසේ වෙතත් ලකුණු 307දී පස්වැනි කඩුල්ල ලෙස අසේල දැවී යාමත් සමග ශ්‍රී ලංකා ඉනිම කඩා වැටුනු අතර ඉනිමට තවත් ලකුණු 20ක් එක්වෙන විට ශ්‍රී ලංකාවේ කඩුලු 5ක් දැවී ගියා.

දකුණු අප්‍රිකාව වෙනුවෙන් ලකුණු 185ක් රැස්කළ ඩු ප්ලෙසි තරගයේ වීරයා ලෙස සම්මාන ලබා ගත්තා.